He paiheretanga angitū o te mātauranga Māori me te hākinakina

Kaupapa Māori Award winner

Pūkenga Matua, Aotahi: School of Māori and Indigenous Studies, Te Whare Wānanga o Waitaha

Ngāti Ranginui

“Ko te mea nui, kia kitea au e taku hapori, i roto  tonu i taku hapori: Ko au tonu te tino tauira o te kanohi kitea (ā-tangata nei) ā-tāne Māori, ā-pūkenga mātauranga, ā-kaiārahi hākinakina hoki.”

Kore rawa a Phillip i whakaaro ka whakakotahitia ngā hao e rua o tōna ngākau, arā, ko te hākinakina me te ao Māori, hei tūranga mahi māna ki tetahi whare wānanga. Waihoki, e whai pānga ana āna mahi i te ao mātauranga ki etahi atu kaupapa o tōna anō ao. He Pūkenga Matua ia ki Aotahi ki Te Whare Wānanga o Waitaha, he kaitohutohu whutupōro rīki, he kaipakihi e whai ana i te mana taurite, he kaitakawaenga hauora, he kaihaka, he hoa tāne, ā, he pāpā hoki ia. Ko ngā mātāpono o te ao Māori ngā mea e ārahi ana i a ia i tēnā tūranga, i tēnā tūranga.

Neke atu i te haurua o ōna tau a Phillip e whakaako ana, e mahi ana hoki i te UC, ā, e kawe ana ia i etahi kaupapa motuhake, arā, ko āna kaupapa rangahau me āna kaupapa kaingākau, ki Aotahi, ā, kua whāngaia hoki ēnei ki ngā Kura o te Toi, o te Ture me te Hauora. Mai anō i te tau 2011, ko tana takohanga kaupapa whakaako matua, ko tetahi akoranga e pā ana ki Te Tiriti me ngā tikanga āpiti e whā, he wāhi tērā o te tohu paetahi o te Kura Māori and Indigenous Studies me ngā kaupapa matua o te Sociology, o te Hītori me te Cultural Studies. Kua whakapūmautia taua kaupapa mā te katoa, ki te tohu Bachelor of Criminal Justice me te Bachelor of Social Work, ā, hei te tau 2025, ka whakapērātia hoki taua akoranga i raro i te kaupapa hākinakina hou o Te Ao Hākinakina Māori, nāna rā i whakatū mō te Bachelor of Sport. I te mea kua whakaturetia tēnei kaupapa ako ki ngā tohu paetahi maha, nā te ngoikore o etahi ākonga ki ēnā mātauranga, kua toro atu a Philiip ki a rātou, ā, ka arotahi ia ki te whanaungatanga, ki te aroha me te ūkaipōtanga (wāhi āhuru) mō rātou ngā ākonga. Kua piki ake te tokomaha o ngā ākonga katoa e angitū ana, ā, kua whāiti haere te āputa i waenganui i ngā ākonga Māori me etahi atu, mai i te 14% i te tau 2018 ki te 4.8% i te rā nei.

Hei tā Phillip, ko tā te kaiwhakaako he whakatauira i ngā painga o te mātauranga ki ngā ākonga me tōna hapori mā roto i ngā āhuatanga o tōna anō oranga. Kei te whakatinana ia i āna anō tikanga o te aroha, o te manaakitanga, o te whakamana tāngata, me te ngākau pono i roto i te akomanga. Ko ia anō te whakatinanatanga o te kaupapa tuakana-teina i roto i āna mahi ia rā, ia rā. Kei te noho ia ki te taha rāwhiti o Ōtautahi, ā, he maha tonu ngā whānau Māori me ērā nō Te Moananui-a-Kiwa kei tērā wāhi, arā, he wāhi he tokoiti nei ngā ākonga e noho roa ana ki te kura, he nui te pōharatanga, me te maha noa o ngā momo hua kino e pā atu ana ki tērā pāpori. Mā te whakatūnga o tetahi tatau ki te mātauranga, mā tana tū tūturu, kei te whai ia kia whakatahuringia ake te kura tuatoru hei wāhi āhurutanga mō te ahurea Māori.

Ko ngā mahi whakaako ā Phillip, he mea ārahi e te ao Māori, me te whakaaro me ngā tikanga Māori. Whakamahi ai ia i te pūrākau, ā, i tana kaupapa ako o Sport and Culture in Aotearoa, ka akiaki ia i ngā ākonga kia tūhura i ō rātou ake wheako kia whai māramatanga ai mō te hākinakina me ngā mahi tohutohu hākinakina. Mā konā ka kite rātou i te hononga i waenga i ā rātou ake pūrākau me ngā tuhituhinga mātauranga. Mā te pūrākau, ka whakapuaki atu a Phillip i ngā tikanga whakaako hou (ahakoa nō mua noa atu), kia whakaaro anō ai rātou he pēhea nei tēnei mea te ako. E rua anō ngā kaupapa Māori matua e ārahi ana i a Phillip i roto i āna mahi whakaako, arā, ko te manaakitanga me te kaitiakitanga. Nā tōna taera whakaako, nā tōna anō āhua ake, me tōna wairua manaaki, kua turakina noa ngā ārai e kaha kitea ana i waenga i te pūkenga whakaako me te ākonga. Kua whakawhiwhia ia ki te tohu Overall UCSA Lecturer of the Year (2021 me te 2022), te Lecturer of the Year Faculty of Arts (2022), te Lecturer of the Year College of Arts (2021) me te University of Canterbury Teaching Medal (2023), ā, kua tae ia ki ngā kōwhiringa whāiti mō te huhua noa o ngā tohu whakahirahira.

Ko Phillip tetahi o ngā kaiwhakaako o te Tohu Paerua mō te hōtaka o te Māori and Indigenous Leadership, ā, e whakaakongia ana, e aromatawaitia ana hoki tēnei kaupapa mai i te tirohanga o te ao Māori. Ko tēnei tohu paetahi, i taketake ake mai i ngā āhuatanga o te wānanga, ā, he mea whakapakari i ngā pūkenga Māori ngaio ki ngā pūkenga, ki te mātauranga me ngā āhuatanga o te hunga ārahi i te ōhanga Māori. Ko tāna, he whakatū wānanga e pā ana ki ngā ariā o ngā Iwi Taketake mō te kaiārahi, mō ngā pūnaha whakawhiti me te mana motuhake o te Iwi Taketake; ā, he wānanga nāna anō i kōkiri e whakakotahi ana i ngā tikanga o te tuku-kauhau ā te pūkenga mātauranga, tae atu hoki ki ngā rukutanga hōhonu o ngā wānanga o te ao hou. Ka hāpai ia i te reo, i ngā tikanga me te mātauranga Māori i roto i āna mahi whakaako katoa, ā, ka whakaurua e ia he kupu me te whakaaro Māori ki roto i āna mahi whakaako, kia noho māori noa ai ēnei āhuatanga katoa o te Māori ki te ahurea auraki o Aotearoa. Ka whai ia i ngā tauira hauora Māori i āna whakaakoranga mō te Bachelor of Sport Coaching, pērā i Te Whare Tapawhā me Te Wheke, kia whai māramatanga ai ngā ākonga mō te toiora, mō te tohutohu hākinakina me ngā tikanga whakaute o te ao hākinakina; otirā, kia whakawhānuitia ake ēnei tauira e rātou, i runga anō i ō rātou ake kitenga, me ā rātou ake pūrākau.

Ka takoha ake a Phillip i ōna mōhiotanga ki ngā tikanga me te mātauranga Māori ki te whare wānanga whānui, arā, ko te mea matua ko te akoranga o Te Tiriti, koia nei tetahi o ngā pou matua o te Bicultural Confidence and Competence kei roto i te Graduate Profile o te Whare Wānanga o Waitaha. He mea āta whakamahi aua kaupapa i te kaupapa Sport and Culture in Aotearoa/New Zealand, kāti, he tuku mōhiotanga ahurea hei tūāpapa tonu mō ngā tūranga hākinakina mō te hunga Kiwi. E toru tau ia e tū ana ki te Human Research Ethics Committee o Te Whare Wānanga o Waitaha, ā, ko ia anō te kanohi Māori i runga i te Ngāi Tahu Consultation and Engagement Group mō te tikanga Māori (2022-23). He ringa ārahi anō hoki a Phillip i ngā hoamahi hou. Nāna hoki te ao hākinakina, te whakaaro Māori me te ao Māori i whakahuihui hei whakatū i te kaupapa Te Ao Hākinakina, he kaupapa matua ako hou e aronui ana ki te hākinakina Māori i te Kura Hauora. Hei te tau 2026, ka tū tetahi akoranga ki te taumata 300 e pā ana ki ngā tikanga Māori i te ao hākinakina, arā, he kaupapa Māori motuhake anō tērā i ngā akoranga hākinakina o te kura tuatoru.

Ki tua atu i Te Whare Wānanga o Waitaha, kua tonoa a Phillip ki te tuku kauhau ki ngā Whare Wānanga o Toyo, o Rikkyo, o Sendai me Josai ki Nīpona, ā, ki etahi atu whare wānanga i Aotearoa nei. Ka rite tonu ngā tono ake kia kōrero ia ki ngā huihuinga hapori, ā, he kaitohutohu ia i Sport NZ, i Oranga Tamariki, i Te Manatū Whakahiato Ora, ā, ki te ao pāpāho hoki. Ko ia te heamana o Canterbury Rugby League, te heamana tuarua o mua hoki o te kapa haka o Te Pao a Tahu. E toro atu ana ngā tikanga whakaako ā Phillip ki te hapori whānui. I te tau 2017, ka whakatū rātou ko tōna hoa wahine, arā, a Stephenie, ko Heperi Harris hoki i te Kutt Kollective i runga i te whāinga kia hangaia ai he huarahi ki te oranga hauora mō te Māori. Ko ngā kaupapa o tēnei kāhui, ko tetahi whare hākinakina mō ngā whānau rawa iti o te taha rāwhiti o Ōtautahi; he wānanga mā ngā rangatahi mō te kaiārahitanga me te hauora mā te whakamahi ā-tauira Māori nei; me te tuku pūtea mā ngā kapa hākinakina o te hapori tata. Whakaako hoki ai ia i te whutupōro rīki, ā, ko ōna tūtakitakinga ki ngā kaihākinakina Māori, he mea whakamōhio i āna mahi akoako. Nō nā tata nei, ka whakahaere ia i tetahi wānanga e kīia ana ko Tama Tū – Hapori Ora, ā, he mea tautoko nā MSD; ā, ka whakamahia ai ko ngā mātāpono Māori ki tetahi wāhi Māori, hei whakahuihui i ngā kaitākaro rīki, ki te kaupare atu hoki i ngā pōhēhē kino e pā ana ki ngā tāne Māori me ērā o Te Moananui-a-Kiwa i te ao hākinakina. E hāngai pū ana ki te tikanga o ‘ako’, ko ia tonu tēnā te kaiako, me te ākonga anō hoki.

“E kore e tāea te whakahē i te tino painga ki a ngāi Māori o tōna kite me tōna rongo i te aroha, i te manaakitanga, i te whakamananga tāngata, i te ngākau pono hoki, i roto rā i te ao mātauranga me te ao hākinakina.”